Për të kuptuar saktësisht përmasat e problemit, janë vendosur 45 kamera në 18 pika kyçe të kryeqytetit, në rrugët dhe udhëkryqet kryesore. Gjatë një periudhe dyjavore, është bërë monitorimi i trafikut përgjatë 24 orëve, duke sjellë të dhëna të sakta mbi lëvizjen e automjeteve. Rezultatet kanë treguar se rreth 140 mijë makina hyjnë në qytet çdo ditë, prej të cilave 13 mijë vetëm gjatë orës kulmore.

Nga analizat e kryera ka rezultuar se rruga që lidh Fushë Kosovën me Prishtinën është më e ngarkuara, me më shumë se 50 mijë makina që hyjnë dhe pothuaj po aq që dalin nga qyteti çdo ditë. Gjatë orës kulmore, numri i automjeteve arrin në 5 mijë. Po ashtu, brenda unazës së brendshme të qytetit qarkullojnë rreth 60 mijë makina në ditë, ku 9 mijë kalojnë në orën më të ngarkuar. Kjo ka bërë që shpejtësia mesatare e lëvizjes të jetë vetëm 12 kilometra në orë, ndërsa vonesat mesatare të jenë 298 sekonda për automjet.

Trafiku i ngarkuar ka krijuar pasoja të konsiderueshme për qytetarët dhe ekonominë e qytetit. Shpenzimet e shtuara për karburant dhe humbjet e mëdha të orëve të punës kanë qenë të vazhdueshme. Po ashtu, nivelet e larta të emetimeve të gazrave kanë ndikuar negativisht në cilësinë e ajrit.

Për të eliminuar ngarkesat e trafikut dhe për të krijuar një sistem më efikas, do të bëhet riorganizimi i plotë i trafikut në unazën e brendshme të qytetit. Lëvizja përgjatë kësaj unaze, që përfshin rrugët “Robert Doll”, “Luan Haradinaj”, “UÇK”, “Agim Ramadani”, “Eqrem Çabej” dhe “Bill Clinton”, do të bëhet në një kah të vetëm, duke ndjekur drejtimin e akrepave të orës. Përjashtim do të bëjë segmenti “Bill Clinton” – “Eqrem Çabej”, deri në pikëprerjen me rrugën “Agim Ramadani”, i cili do të mbetet dykahor.

Për të lehtësuar lëvizjen dhe për të shmangur vonesat, do të ndërtohen dy nënkalime për automjete: një në udhëkryqin pranë “Katedrales” dhe një tjetër përbri “Xhamisë së Çarshisë”. Nga 20 udhëkryqe të planifikuara, vetëm udhëkryqi tek “Menza e Studentëve” do të mbajë semaforë, duke bërë që pjesa tjetër e unazës të jetë pa pengesa.

Me këtë riorganizim, rrugët njëkahore do të kenë tre shirita: dy për automjete dhe një për transport publik. Po ashtu, do të shtohet një shirit për çiklistë, ndërsa për këmbësorët do të ndërtohen trotuare dhe shtigje të gjelbra. Kjo zgjidhje pritet të reduktojë kohën e qarkullimit nga 55 minuta në vetëm 12 minuta për një qark të plotë në unazë. Reduktimi i humbjeve kohore dhe financiare është i dukshëm, dhe emetimet e gazrave pritet të bien ndjeshëm.

Sipas të dhënave, pritja në udhëkryqe do të reduktohet me 2300%, shpenzimet për karburant do të bien me 80%, dhe shpejtësia mesatare do të rritet nga 12 në 37 kilometra në orë, një përmirësim prej mbi 200%.

Zbatimi i kësaj zgjidhjeje do të transformojë mënyrën e lëvizjes në kryeqytet, duke e bërë atë një qytet modern dhe efikas. Përmirësimet janë të ndjeshme në çdo aspekt, duke e bërë jetën më të lehtë për qytetarët dhe duke ndihmuar në ruajtjen e ambientit. Rrjedhimisht, në çdo indikator, përmirësimi është thellësisht i ndjeshëm. Radhët e gjata të makinave nuk janë më, sepse zgjidhja për problematikën e trafikut të ngarkuar në qytet është përfundimtare. Kjo e bën Prishtinën qytet modern. Qytet të së ardhmes.

Një pjesë të udhës në këtë drejtim do të bëhet përmes mbikalimeve. Tre të tilla: në Aktash, midis Pallatit të Rinisë dhe Hotelit Grand dhe në Arbëri, do të bëjnë të mundur që çdo qytetar të dalë në bulevardin qendror në këmbë, pa asnjë pikë takimi me makinat. Më i madhi prej tyre do ta lidhë Arbërinë me Pallatin e Rinisë.

Projekti është rrjedhojë e analizave shteruese për fizibilitet, funksionalitet, strukturë të popullsisë, lëvizje e qasshmëri, vetqëndrueshmëri, dhe dhjetëra parametra të tjerë. Do të ndërtohet midis pjesës së vjetër dhe asaj të re të lagjes, pikërisht aty ku ishte paraparë me projektin e Pallatit të Rinisë, para pothuaj pesë dekadash.

Dhe do ta lehtësojë përditshmërinë e mbi 50 mijë prishtinasve, të cilëve u mundësohet kalimi i sigurt në këmbë, deri tek Pallati i Rinisë dhe tutje në bulevardin qendror. Në pikat kyçe do të ketë ashensorë, në mënyrë që personat me nevoja të veçanta, probleme shëndetësore dhe çdonjëri tjetër me pamundësi për të përdorur shkallët, ta ketë të lehtë qasjen në të.

Si i tillë, përtej të qenit thjesht një mbikalim, është një ishull urban shumëfunksional, me rëndësi që kalon ndërlidhjen e dy pikave të qytetit. Konfigurimi i terrenit në lagjen Arbëria, me pjerrësi të lartë, e bën të vështirë pasjen e hapësirave të bollshme publike për banorët.

Hapësirat e gjelbra, mini-parqet me lojëra për fëmijë, shtigjet e vrapimit dhe shtigjet për biçikleta, do t’i japin frymë dhe do të krijojnë dimensione të reja për gjithë lagjen, teksa nën to do të vazhdojë qarkullimi i papenguar i makinave. Për ta bërë të vetëqëndrueshëm kemi projektuar mbi 2 mijë metra katror lokale, në katin përdhesë, të cilat mund të përdoren për qëllime komerciale.

Krejt këto, në një ishull urban shumë modern. Një mbikalim, që përveç një lagjeje me pjesën tjetër të qytetit, e lidh qytetin me të ardhmen. Për Prishtinën e së ardhmes.

Ngarkesa e trafikut në këtë pikë, kolonat e gjata drejt hyrjes për në Prishtinë, janë problem për automjetet, trafikun urban dhe këmbësorët. Pas matjeve dhe analizave të shumta në terren, ekipi ynë i ekspertëve dhe inxhinierëve të trafikut, ka ofruar zgjidhjen teknike optimale.

Ky propozim parasheh ndërtimin e një udhëkryqi të ri, që ndër të tjera, i eliminon fytet e ngushta, dhe krijon lidhje të lehta me rrugët anësore në të gjitha drejtimet. Duke shfrytëzuar software-in për simulim, zgjidhja u testua dhe funksionon edhe nëse trafiku në këtë pikë rritet për 30%, për 60% ose madje 100%.

Për më tepër, projekti përfshin ndërtimin e korsive të veçanta për lëvizjen e automjeteve, duke krijuar një rrjedhë të pandërprerë dhe më efikase të trafikut. Ky riorganizim do të eliminojë pikat e ngushta dhe do të përmirësojë dukshëm rrjedhën e trafikut, duke zvogëluar kohën e pritjes dhe duke lehtësuar lëvizjen në këtë nyjë të rëndësishme të kryeqytetit.

Gjithashtu, duke pasur parasysh sigurinë e këmbësorëve dhe efikasitetin e transportit publik, projekti do të përfshijë edhe korsitë e dedikuara për këto kategori. Kjo do të krijojë një mjedis më të sigurt dhe të organizuar për të gjithë përdoruesit e rrugës.

Kjo zgjidhje është ideale për këtë pikë për 20 ose 30 vitet e ardhshme, dhe trajtimi i çdo pike problematike të trafikut është prioritet për ta transformuar Prishtinën në kryeqytet të së ardhmes. Investimi në infrastrukturën moderne dhe të qëndrueshme është thelbësor për zhvillimin afatgjatë të qytetit dhe përmirësimin e cilësisë së jetës për të gjithë banorët.

Një nyjë lidhëse midis të vjetrës dhe të resë, që do të shtrihet midis Pazarit të Vjetër dhe Pazarit të Ri që po e bëjmë për qytetin.

Dhjetë lagjet kryesore të qytetit dhe 200 mijë prishtinas do të lidhen përmes saj.

Tre mbikalimet që i patë, ai nga Arbëria, pasarela dhe tjetri nga Aktashi, bëjnë të mundur që të arrihet në bulevard pa u takuar në asnjë moment me makinat.

Sheshet e gjera, hapësirat e gjelbra, parqet e lojërave për fëmijët dhe zonat rekreative për të rinjtë shtrihen përgjatë tij.

Përmes këtij bulevardi, qyteti është nxjerrë nga kufizimet e trashëguara, në një dimension të ri dhe modern. Kjo është e ardhmja e Prishtinës, sot.

Ne kemi dalë përtej kësaj. Po e digjitalizojmë hartën e krejt qytetit. Prishtina në pëllëmbë të dorës, është projekti që përfundon shpejt.

Skanimi i qytetit me rezolucion të lartë na e bën të mundur që shërbimet për të cilat është dashur të dalin inspektorë në terren, të kryhen nga zyra.

Prej aty mund t’i kryejmë të gjitha matjet, me saktësi pothuaj të qindpërqindtë, për të gjitha intervenimet që mund të ketë nevojë të kryhen.

Dhe ta ruajmë qytetin nga të gjitha ndërhyrjet e palejuara, të cilat mund t’i bëjë kushdo që nuk e respekton ligjin.

Po ashtu, duke i digjitalizuar ndërtesat publike, të gjitha ndërhyrjet e nevojshme dhe kostot e tyre, ne i dimë në avans.

Për çdonjërën ka një historik, i cili ruhet dhe nuk mund të tjetërsohet. Kjo do të jetë Prishtina digjitale.

Lojërat Mesdhetare janë një festë e madhe e sportit dhe kulturës, që nxjerr në pah fuqinë përbashkuese të sportit, që prej antikitetit. Organizimi i tyre në Prishtinë më 2030 e tejkalon këtë përkufizim, duke marrë trajtën e një tjetër arritjeje të rëndësishme në zhvillimin urban dhe shoqëror. Përmes të qenit nikoqire e atyre lojërave, kryeqendra e Kosovës mëton të shndërrohet në një qytet modern, të zhvilluar ekonomikisht dhe të ndërlidhur e interesant për të huajt. Përgatitjet për këto lojëra paraqesin një prej ndërmarrjeve më të mëdha në vend, në një sërë rrafshesh dhe shërbejnë si pikëpjekje midis ambicies, inovacionit dhe përkushtimit për qytetin e së ardhmes. Synimi i këtij projekti madhor është nxjerrja e Prishtinës në harën e qyteteve të rëndësishme botërore të sportit, me veçanti urbanistike dhe mikpritje të dallueshme.

Një aspekt tjetër i rëndësishëm i këtij projekti është edhe ai ekonomik. Përmes projekteve të ndërtimit dhe punëve të tjera që ndërlidhen me to, stimulohet punësimi i banorëve të zonave përreth, gjë që në mënyrë të tërthorë injekton para në ekonominë e qytetit. Pas mbarimit të lojërave, një pjesë e hapësirave parashihet të adaptohen dhe riorganizohen për përdorim nga komuniteti, duke bërë të mundur që i gjithë kompleksi të ketë shfrytëzueshmëri dhe levërdishmëri në afat të gjatë kohor. Për këtë projekt kaq të rëndësishëm është qenësor parimi i qëndrueshmërisë, ashtu që të gjitha ndërtimet t’i plotësojnë kushtet më rigoroze mjedisore. Prej ndërtesave që minimizojnë harxhimin e energjisë elektrike, tek sistemet e menaxhimit të mbetjeve që promovojnë riciklimin, çdo aspekt i Fshatit Olimpik është i menduar për ta ulur ndikimin në mjedis.

Në rrafshin arkitekturor, për ndërtimin e Fshatit Olimpik premisa të rëndësishme janë inovacioni dhe funksionaliteti, veçanërisht në ndërtimin e disa ngrehinave sportive të domosdoshme për zhvillimin e lojërave. Në zemër të projektit parashihet të vendoset stadiumi i futbollit, i cili përveç rolit qendror në hapjen dhe mbylljen e Lojërave Mesdhetare, pas mbarimit të tyre do të kthehet në arenën më të rëndësishme futbollistike të vendit. Krahas stadiumit, një hapësirë shumë e munguar si ajo e sporteve ujore, me përmasa olimpike, do të mirëpresë garat e notit, zhytjes dhe water polo-s. Me mbarimin e Lojërave Mesdhetare, këto hapësira do të mund të kalojnë në shërbim të komunitetit dhe të federatave përkatëse, për t’i dhënë një shtytje të re sporteve ujore.

Po ashtu parashihet ndërtimi i një salle të sporteve me dorë, që përveç për sportet si basketbolli, hendbolli e volejbolli, do të ishte e përshtatshme edhe për gjimnastikë dhe atletikë në hapësira të mbyllura. Kjo hapësirë do të ishte shumë-përdorimëshe dhe lehtë e përshtatshme për një numër të madh sportesh. Në këtë rast, fokusi do të vihet tek arkitektura modulare, në mënyrë që kjo hapësirë të mund t’i shërbejë infrastrukturës sportive të qytetit për një kohë relativisht të gjatë. Në Masterplan, pjesë e rëndësishme është edhe ndërtimi i disa fushave të tenisit, me një fushë qendrore, që po ashtu do të mund të përdoret edhe për sporte të tjera si hendbolli, volejbolli dhe futbolli i vogël. Meqë sportet luftarake janë ndër më të zhvilluarat në vend, me theks të veçantë xhudo, karate dhe boksi, parashihet ndërtimi i një salle të standardeve ndërkombëtare, me të gjitha hapësirat e nevojshme, ku do të zhvillohen garat për Lojërat Mesdhetare dhe më pas të organizohen gara rajonale dhe europiane.

Në tërësinë e tij, Fshati Olimpik është një projekt madhështor që prek sferën ekonomike, shoqërore dhe mjedisore. Qëllimi është që ky kampus të kthehet në një nga hapësirat më të rëndësishme sportive në rajon, duke krijuar vlerë të shtuar për komunitetin dhe për vetë qytetin. Hapësirat administrative, komerciale dhe rezidenciale, që gjatë mbajtjes së garave do të jenë plotësisht në funksion të tyre, pas mbarimit do të jenë në shërbim të komunitetit dhe të vetë kampusit olimpik. Kjo e bën Prishtinën e së ardhmes një kryeqytet të sportit, që është vizioni ynë.

Vetëm në nyjën e rrugëve “Agim Ramadani”, “Haxhi Zeka” dhe “Ibrahim Lutifu”, përskaj Xhamisë së Çarshisë, në një ditë të zakonshme kalojnë rreth 30 mijë makina. Në kohët e pikut, nëpër këtë nyjë kalojnë mbi 12 mijë makina. Pra, 40 për qind e trafikut ditor.

Këto shifra janë të mjaftueshme për të vënë në pah rëndësinë e zgjidhjes së problematikës së trafikut në këtë zonë. Sipas Planit të Mobilitetit të Qëndrueshëm Urban (PMQU), zhvillimi i një sistemi të integruar të transportit publik, që synon përmirësimin e qasjes në të gjithë qytetin dhe përmirësimin e lidhjes ndërmjet vendbanimeve të tjera urbane në partneritet me ofruesit e transportit publik, është zgjidhja e këtij problemi.

Projekti parasheh ndërtimin e nënkalimit ku do të bëhet zgjerimi i sheshit deri te Sahatkulla, si dhe do të bëhet lidhja me sheshin ekzistues të njohur si Trekëndëshi. Ndërsa, automjetet do të qarkullojnë nën të.

Edhe sipas Planit Rregullues “Qendra 1” dhe , parashihet ndërtimi i një tuneli në këtë zonë, me qëllim të zgjerimit të shesheve qendrore të qytetit dhe lidhjes së tyre me zonën e vjetër historike.

Tuneli shtrihet në rrugën “Agim Ramadani”, kurse në drejtimin kah Gërmia, nuk do të jetë i mundur ndërtimi, për shkak të zonave të mbrojtura te Xhamia e Madhe dhe Akademia e Arteve. Për ta rregulluar qasjen në atë rrugë do të ofrohen alternativa që shkarkojnë ngarkesat e trafikut të cilat rëndoheshin në kryqëzimin me rrugën “Agim Ramadani”.

Tuneli parshihet të ketë tre shirita qarkullues, prej të cilëve njëri do të jetë vetëm për autobusë dhe dy të tjerët për automjete. Ai do të fillojë nga ndërtesa e Komunës së Prishtinës dhe deri tek ndërtesa e Teatrit Kombëtar, me gjatësi prej 240 metrash.

Në aplikacionin e paraqitur, përveç hapësirave ekzistuese, vendi ka marrë obligim që, për të garantuar mbarëvajtjen e lojërave në nivelin më të lartë, t’i ndërtojë të gjitha hapësirat të cilat nuk i plotësojnë kushtet apo që nuk ekzistojnë fare.

Më e rëndësishmja ndër to është Qendra Olimpike, siç e kemi quajtur në draft-propozimin e Masterplanit dhe e cila do të jetë e vendosur në Bërnicë. Është zgjedhur kjo hapësirë, për shkak të pozicionit të përshtatshëm gjeografik dhe afërsisë me kryeqytetin.

Kompleksi do të ndërtohet në 60 hektarë dhe përveç hapësirave sportive do t’i ketë të gjitha ambientet tjera shoqëruese, përfshirë hapësirat administrative, komerciale dhe një stacion të autobusëve.

Hapësira qendrore do të jetë e dedikuar për stadiumin e futbollit, që mëton të jetë një nga kryeveprat arkitekturore të qytetit. Përveç ngrehinës qendrore, e cila do të ndërtohet duke pasur në mendje zhvillimin teknologjik dhe që do të ketë 25 mijë ulëse, do të ketë edhe dy fusha tjera stërvitore, me bar natyral.

Afër stadiumit do të jetë kompleksi i pishinave olimpike, që do të ndërtohet në përputhje me kriteret më të larta ndërkombëtare, duke synuar që të kthehet në një nga ambientet më të rëndësishme në rajon për sporte ujore. Përgjatë Lojërave Mesdhetare 2030, ky kompleks i përbërë nga një pishinë e brendshme dhe dy pishina të jashtme do të jetë hapësira kryesore në të cilën do të zhvillohen garat e sporteve ujore.

Një prej sporteve më të rëndësishme, të cilit deri tani në vend i ka munguar infrastruktura, do të ketë kompleksin e tij brenda kësaj qendre. Për të përmbushur kërkesat e evenimentit do të ndërtohet një fushë qendrore, që natyrshëm do të jetë pika fokale e përballjeve në këtë sport dhe që do të ketë 2 mijë ulëse, si dhe gjashtë gusha të tjera, secila me nga 200 ulëse për tenis-dashësit. Përveç tenisit, fusha qëndrore ka parametra të atillë që mundëson luajtjen brenda saj edhe të ndeshjeve të hendbollit, volejbollit dhe futbollit të vogël.

Në anën tjetër të qendrës do të jetë e vendosur qendra e sporteve me dorë dhe ajo e sporteve luftarake. Hapësira qendrore e sporteve me dorë, ku do të luhen të gjitha ndeshjet në basketboll, hendboll dhe volejboll do të ketë kapacitet maksimal prej 3 mijë e 500 ulësesh dhe duke qenë e ndërtuar me standardet më të larta, hapësirat e saj do të jenë të përdorshme në variante të ndryshme.

Arena e sporteve luftarake, e vendosur në krah të asaj të sporteve me dorë, do të ketë kapacitet po për 3 mijë e 500 shikues dhe pas përfundimit të Lojërave Mesdhetare synohet të kthehet në qendrën e munguar të nivelit më të lartë, për të gjithë sportistët e këtyre disiplinave që ka vendi.

Atletika dhe disa sporte të tjera, përfshirë çiklizmin dhe 3×3 basketbollin, do të zhvillohen në fushat e hapura, të cilat kanë kapacitet maksimal prej 5 mijë ulësesh.

Përveç hapësirave sportive, kompleksi do të ketë edhe hapësirat administrative, për federata dhe Komitetin Olimpik të Kosovës, një parking të madh dykatësh nën tokë, stacionin e autobusëve dhe hapësira komerciale, përfshirë një qendër tregtare, hotelin, ku do të jetë e vendosur qendra e konferencave, si dhe pjesën akomoduese të Fshatit Olimpik.