Nxjerrja në publik e draft-propozimit për Masterplanin e Qendrës Olimpike, që do të shërbejë si nyja kryesore e Lojërave Mesdhetare 2030 është përcjellë me interesim të madh nga mediat mbarëshqiptare.

Pas publikimit, kjo pamje në të ardhmen e sportit kosovar, ka pushtuar ballinat sportive të mediave më të rëndësishme online, në Kosovë dhe Shqipëri. Telegrafi, Gazeta Express, Klan Kosova, Albanian Post, Gazeta Tema, Lapsi.al, Dukagjini dhe Gazeta Blic, janë vetëm disa prej institucioneve të rëndësishme mediale të cilat i kanë dhënë rëndësi të veçantë publikimit të këtij draft-propozimi.

Duke vënë theksin tek rëndësia e madhe që ka organizimi i mirëfilltë i një ngjarjeje të tillë, gjë ntë të cilën infrastruktura ka rol të pazëvendësueshëm, një numër i konsiderueshëm prej tyre kanë trajtuar me kujdes hapat e rëndësishë që po ndërmirren në drejtim të garantimit të arritjes së objektivave të vendosura.

Prishtina fitoi garën për organizimin e Lojërave Mesdhetare të vitit 2030 para tre muajsh. Një gamë e gjerë sportesh, në tërësi 24 sish, prej të cilave 21 i takojnë disiplinave olimpike dhe tre të tjera joolimpike, do të luhen në kuadër të tyre.

Në aplikacionin e paraqitur, përveç hapësirave ekzistuese, vendi ka marrë obligim që, për të garantuar mbarëvajtjen e lojërave në nivelin më të lartë, t’i ndërtojë të gjitha hapësirat të cilat nuk i plotësojnë kushtet apo që nuk ekzistojnë fare.

Më e rëndësishmja ndër to është Qendra Olimpike, siç e kemi quajtur në draft-propozimin e Masterplanit dhe e cila do të jetë e vendosur në Bërnicë. Është zgjedhur kjo hapësirë, për shkak të pozicionit të përshtatshëm gjeografik dhe afërsisë me kryeqytetin.