Kryeqytetet janë përherë të ngarkuara. Trafiku është një ndër ato rëndesa. Sepse kur në qytet hyjnë mbi 100 mijë makina dhe brenda janë dhe pothuaj aq, nuk ka si të ndodhë ndryshe. Vetëm në një prej nyjave qendrore, përbri Xhamisë së Çarshisë në Prishtinës, brenda ditës, kalojnë 30 mijë makina. 12 mijë prej tyre në kohën e pikut. Këto shifra janë të mjaftueshme për të vënë në pah rëndësinë e gjetjes së një zgjidhjeje. Pasi kemi analizuar shifrat, peshuar mundësitë dhe konsultuar dokumentacionin, kemi arritur në një të tillë. Ndërtimi i një nënkalimi në pikëprerjen e rrugës “Agim Ramadani” me rrugën “Ibrahim Lutfiu”. Me gjatësi 230 metra, gjerësi 15 metra dhe tre shirita qarkullues, njëri prej të cilëve vetëm për autobusë, përmes tij do të futet nën tokë i gjithë trafiku i asaj zone. Nënkalimi do të fillojë nga ndërtesa e komunës dhe do të shtrihet deri prapa ndërtesës së Teatrit Kombëtar. Është i paraparë edhe me Planin Zhvillimor Urban dhe përveç zgjidhjes së trafikut të ngarkuar do të mundësojë zgjerimin e shesheve aktuale. Kjo bën të mundur që sheshi qendror i Prishtinës do të shtrihet nga rrethi me flamur në Ulpianë, tek Sahat Kulla, në pjesën e vjetër të qytetit. Pra, më shumë hapësira të gjelbra dhe shtigje për këmbësorë. Projekti i nënkalimit ka kaluar në fazën e prokurimit. Dhe është pjesë e vizionit për Prishtinën e së ardhmes.